Blog

ဒေါ်မိအောင် Daw Mi Aung

“မုန့်ကိုရောင်းကာ မောင့်ကိုကျွေးပါ့မယ်”

လူ့ဘဝမှာတွေးခဲ့တာတစ်မျိုး၊တကယ်ကြုံရတာတစ်မျိုးမို့အတော်ထူးဆန်းတာပါ။ချစ်သူနှစ်ဦး အတူနေကြရင် ဘယ်လိုဘယ်ပုံလုပ်ကိုင်စားသောက်ကြမယ်ဆိုတဲ့ စီမံကိန်းလေးတွေတော့ဆွဲကြမှာဧကန်ပါ။ဒါပေမဲ့ တာဝန်ယူတတ်ပြီး၊တာဝန်သိတတ်တဲ့ ကျမအဖေလိုလူမျိုးကတော့ မိန်းမကိုခိုင်းစားမည့်ယောကျာ်းထဲမှာမပါပါဘူး။အမေ အမြဲပြောတဲ့”ညည်းအဖေလိုလူမျိုးမရှိပါဘူး” ဆိုတာ၊ ကျမအသက်ကြီးမှနားလည်တာပါ။

(ဟင်း!! အမေကသူ့ယောကျာ်းကိုရှိတုန်းတော့တည့်အောင်မပေါင်းဘဲနဲ့ လို့အမြဲတွေးခဲ့မိပါတယ်။)

ပြောခဲ့ဘူးသလိုဘဲ အဖေကအလုပ်မရှိ၊ဘာလုပ်လုပ် ဘေးကြပ်နံကြပ်ဖြစ်နေချိန်မှာ၊ အမေကရှပ်အင်္ကျီကြယ်သီးတပ်ပြီးလောလောဆယ် မချေးမငှားရအောင်ကြိုးစားလုပ်ကိုင်ပေးခဲ့ပါတယ်။ လင်နဲ့သားသ္မီးကိုပြည့်စုံစေချင်တဲ့စိတ်က အမေ့ဆီမှာအပြည့်။ ကုန်သည်သားသ္မီးဆိုတော့လဲ စီးပွါးရေးအမြင်ရှိတော့၊ သူမို့စဥ်းစားပြီးလုပ်တတ်တယ်။အဖေ့ကိုတောင်အံ့အားသင့်စေခဲ့တာပါ။

အဲ့ဒီကာလက အခြေခံစားသောက်ကုန် ၃၇မျိုးလား၊၃၂မျိုးလား

(ကျမသိပ်မမှတ်မိ၊ဇဝေဇဝါ)၊

ကန့်သတ်ကုန်လို့သတ်မှတ်ပါတယ်။ပြည့်သူ့ဆိုင်မှာတန်းစီပြီးဝယ်ရတဲ့ခေတ်ပါ။မြင်တတ်တဲ့အမေက ကြက်သွန်၊ငရုတ်သီးအစရှိတဲ့ပစ္စည်းအမျိုးမျိုးကို ဝယ်ပြီး၊စျေးထဲကဆိုင်တွေကိုပြန်သွင်းပါတယ်။ ငွေအရင်းအနှီးကလဲမဖြစ်စလောက်မို့အတော်ပင်ပမ်းရှာမှာပါ။နောက်တော့ တစ်နေ့ကိုနှစ်ခေါက်သုံးခေါက်လောက်အမြဲသွားနေတာမို့ ဆိုင်ကအမျိုးသ္မီးနဲ့ခင်ပြီး၊ငွေမရှင်းခဲ့နဲ့ တခါထဲများများယူသွား၊ စျေးထဲမှာသွင်းပြီးမှပြန်လာပေးဆိုတာမျိုးဖြစ်လာတော့ အမေနဲနဲ ပင်ပမ်းတာသက်သာတာပေါ့။

(အမေTargetထားပြီး ပစ္စည်းယူတဲ့ဆိုင်က သူဌေးရပ်ကွက်မို့ ပြည်သူ့ဆိုင်(ပ ပ က)မှာဝယ်သူမရှိ။ပစ္စည်း အစုံရနိုင်တဲ့ဆိုင်။ တာဝန်ခံအန်တီကြီးရဲ့နံမည်ဒေါ်မြမြဆိုတာကိုတောင် အမေမကြာခဏပြောလို့မှတ်မိနေပါသေးတယ်။ ကျေးဇူးရှင်တစ်ဦးပါဘဲ။)

ဒီလိုနဲ့မောင်လေးကိုမွေးဖို့နီးလာတော့အမေပစ္စည်းသွားမယူနိုင်တော့ပါဘူး။အဒေါ်တစ်ယောက်ကို အဲ့ဒီဆိုင်နဲ့ဆက်သွယ်ပေးပြီး၊ဘယ်မှာပြန်ရောင်းဆိုတာကအစသင်ပေးပြီး အလုပ်လုပ်ပေးခိုင်းတာပါ။ အမေ မျက်နှာမြင်ပြီးတစ်ပါတ်နှစ်ပါတ်လောက်တော့ အရင်းဘယ်လောက်၊ အမြတ်ဘယ်လောက်နဲ့စာရင်းရှင်းပေးနေတာဟုတ်လို့ဘဲ။

နောက်ပိုင်းမှာတော့ ဆိုင်ကပစ္စည်းမရတော့ဘူးလို့ဆိုပါတယ်။မောင်လေး (၃)လသားလောက်ရောက်မှ အမေအပြင်ထွက်၊ ပ ပ ကဆိုင်ကိုသွားတော့ အဲ့ဒီအမျိုးသ္မီး အမြဲပစ္စည်းလာယူပြီးရောင်းတဲ့အကြောင်းသိရတော့တာ။ ဒါပေမဲ့ ဘာတစ်ခွန်းမှမပြောခဲ့ဘဲ ဟုတ်ကဲ့ ၊ဟုတ်ကဲ့နဲ့ဘဲအိမ်ကိုပြန်လာလိုက်တာ။ အဖေ့ကိုပြန်ပြောပြတာတော့ “စားပါစေ၊သူများစားပေါက်ကိုမပိတ်ချင်ပါဘူး”တဲ့။

အမေ့အတွက် သင်ခန်းစာရလိုက်တာကတော့ဟင်းစားဘဲပေး၊ကွန်ချက်မပြနဲ့ ဆိုတာလေးပါဘဲ

နောက်တော့လဲ အဆက်အသွယ်တစ်ခုပြီး တစ်ခုရလာပြီး၊ အလုပ်အကိုင်တွေအဆင်ပြေလာတာဟာအမေ့ရဲ့စိတ်စေတနာကြောင့်လို့ လို့တွေးမိပါတယ်။

နောက်ပိုင်းအဖေကိုယ်တိုင်လဲ နိုင်ငံရေးသမားတစ်ဖြစ်လဲကုန်သည်ကြီးလုံးလုံးဖြစ်သွားရတော့တာပါဘဲ။

တစ်သက်လုံးစျေးရောင်းရတဲ့အလုပ်ကိုမလုပ်ခဲ့ဘူးတဲ့အဖေ့ကိုအားဖြည့်တိုက်တွန်းဆွဲဆောင်နိုင်တဲ့ကျမတို့အမေကိုတော့ဘယ်လိုချီးကြူးရမှန်းတောင်မသိပါဘူး။

မောင်တစ်ထမ်း မယ်တစ်ရွက်နဲ့ သားသ္မီးတွေကိုပြုစုပျိုးထောင်ရင်း အင်မတန်ပျော်ခဲ့ကြရတာပါ။ လေပြေလေးမလာခင်တော့ မုန်တိုင်းကို​ကျော်ဖြတ်ကြရတာပေါ့လေ။

ကြိုးစားရင်းနဲ့ဘဲ – – – -တစ်နေ့တော့ ပန်းတိုင်ရောက်ရတာအမှန်ပါဘဲ။

ဒေါ်မိအောင် Daw Mi Aung

မျက်မမြင်ကျောင်းအတွင်းမှာဖွင့်ထားတဲ့မြူနီစပါယ်ကျောင်းကတော့ကျမပထမဆုံးပညာသင်ကြားခဲ့ရတဲ့ကျောင်းပါ။ဥယျာဥ်လမ်းအိမ်ကနေကျောင်းကိုသွားဖို့၊စလင်းကျောင်းတိုက်ကြီးကိုဖြတ်ပြီး၊ပန်းပင်ကြီးလမ်းဖက်ကိုမျက်နှာပြုထားတဲ့ကျောင်းပေါက်ကဝင်ရပါတယ်။(မှတ်မိသလောက်တော့ တစ်ထပ်ကျောင်းဆောင်ရှည်ရှည်လေးပါဘဲ။)

လက်ဦးဆရာမကြီးက ဒေါ်နှင်းနုပါ။ လက်ရေးလှအောင် လက်ထပ်သင်ပေးခဲ့တာပါ။ ခုအချိန်ထိ ရင်ထဲမှာတမ်းတပြီးကန်တော့လျက်ပါ။

တစ်နှစ်မပြည့်ခင်မှာဘဲ ဌာနာလမ်းမှာနှစ်ထပ်ကျောင်းဆောင်ကြီးဆောက်ပြီးလို့မျက်မမြင်ကျောင်းကနေပြောင်းကြရပါတယ်။

အမေအမြဲပြောပြောနေတာလေးကိုလဲအမှတ်ရနေတာပါ။မနက်ဖက်ကတော့အဖေကရုံးသွားခါနီးအနှီးကအစလျှော်ပေးခဲ့တာပါ။ညနေစာချက်တဲ့အချိန်ကျမှအမေပြာယာခတ်ရတော့တာပါဘဲ။ညီမလေးကငို၊ကျမက အီးကုန်းပေးဖို့အော် ထမင်းအိုးကငှဲ့နေရင်းဆိုတော့ ဘာလုပ်ရမှန်းတောင်မသိလို့ အော်ငိုရတဲ့အဖြစ်တဲ့။

(ကျမ အသက်ကြီးလာတဲ့အထိရင်ထဲစွဲသွားတဲ့အဖြစ်ကတော့ မပြည့်စုံတဲ့ဘဝဟာခါးသီးလှတယ်ဆိုတာပါဘဲ။)

တစ်နေ့တော့အဒေါ်အငယ်ဆုံးစိန်စိန်ကလည်း အထုပ်ကလေးပိုက်၊သ္မီးကြီးလက်ကိုဆွဲ၊ သ္မီးငယ်လေးကိုချီလို့ဥယျာဥ်လမ်းအိမ်ကိုရောက်လာတာမျက်စိထဲမှာခုထိမြင်ယောင်တုန်းပါ။ “မမေရေ ကုန်ပြန်ပြီ” လို့ပြောတာလေး။စိန်စိန်ကိုသနားလိုက်တာ။ကွမ်းခြံ(ယ္ခုကွန်ဒိုတွေဆောက်ထားတဲ့နေရာ) မီးလောင်လို့ပါ။

သ္မီးငယ်လေးကကျမညီမလေးထက်တစ်လငယ်ပြီး၊သ္မီးကြီးကကျမထက် ၂ နှစ်ငယ်ပါတယ်။

မတိမ်းမယိမ်းညီအစ်မတွေပါ။ အကြီးမ ခင်စန်းနုကသိပ်စွာတာဘဲ။ အမေကမုန့်ခြောက်လေးတွေကိုမုန့်ပုံးနဲ့ထည့်ပေးထားတာ။ တစ်နေ့တော့သူကမုန့်ပုံးဖွင့်လို့ ကျမကတားတာ၊ပုံးကိုလက်တစ်ဖက်ကဖွင့်ပြီးလက်တစ်ဖက်ကကျမရဲ့ဗိုက်ကိုလိမ်ဆွဲထားတာ။

ဒါပေမဲ့ ကျမတို့ညီအစ်မတွေခုထိသိပ်ချစ်ကြတာပါဘဲ။ နောက်တော့လဲ စကားဝါပင်လမ်းအိမ်ကအမေ့မောင်အကြီးကအိမ်ထောင်ပြုပြီးအိမ်ခွဲသွားလို့၊ အမေကြီးတစ်ယောက်ထဲမို့ ကျမတို့မိသားစုစကားဝါပင်လမ်းအိမ်ရောက်ခဲ့ကြရပြန်ပေါ့။

ဒီလိုပါဘဲ ၊ ဘဝဆိုတာတသမတ်ထဲမရှိဘဲအမြဲပြောင်းလဲနေတာပါ။

ပျော်သလားဆိုတော့လဲ မသိပျော်ပျော်နေကြတာဘဲ။ငိုစရာရှိတော့လဲငိုလိုက်ကြ။ရယ်လိုက်ငိုလိုက်နဲ့ဘယ်တော့များမှ – – – -။

သံသရာလည်သရွေ့ကြုံနေကြရဦးမှာပါလား လို့တွေးမိတာပါ။

ဒေါ်မိအောင် Daw Mi Aung

ဥယျာဥ်လမ်းအိမ်ရောက်တော့ ဝတုတ်တုတ်ချစ်စရာကောင်းတဲ့ညီမလေးတစ်ယောက်လက်ဆောင်ရလိုက်တယ်။

ကလေးအသိပျော်နည်းလေးနဲ့ထီးခြင်ထောင်အောက်ထဲမှာယက်ကန် ယက်ကန်ဖြစ်နေတဲ့နီနီရဲရဲလေးနားက မခွါနိုင်အောင်ပျော်ခဲ့ရတယ်။

ကစားစရာအရုပ်ကလေးရသလိုမျိုး။

မိဘတွေက ကစားစရာအရုပ်ဝယ်ပေးတတ်တဲ့အလေ့အထမှမရှိတာ။ကျမငယ်ငယ်က မကြာခဏနေမကောင်းဖြစ်ရင်၊ စဥ့်အိုးတန်းလမ်းမှာဖွင့်ထားတဲ့ ဒေါက်တာဟတ်မွန်ဆေးတိုက်ရောက်မှနေကောင်းသွားတာ။အဲ့ဒီဆေးတိုက်မှာ Toy Landလိုအရုပ်တွေစုံလို့။ ကလေးဆိုတော့လိုချင်တာ။

ခုမှပြန်တွေးကြည့်တာပါ။ဆေးတိုက်သွားရင်ဂျစ်ကားငှားခက 5/-ကျပ်၊ ဆေးခန်းပြတာက5/-ဆိုတော့ ရုံးဝန်ထမ်းမိသားစုအဖို့စရိတ်စကများလှတာကို။

မိဘကတော့သားသ္မီးအလိုကိုဖြည့်ပေးချင်ရှာကြမှာပါ။

အသက်ကြီးလာလေ မိဘမေတ္တာကိုနားလည်မိလေပါ။

အမေနဲ့အဖေပြန်ပေါင်းပြီး ဗဟန်းမှာနေကြရတာ။ ဒါပေမဲ့ မနက်လင်းတာနဲ့အဖေကကျမနဲ့အမေကိုဆိုင်ကယ်ပေါ်တင်ပြီး၊ ကြည့်မြင်တိုင်ကအမေကြီးအိမ်ကိုပို့ခဲ့တာ။

မိန်းမနဲ့ကလေးကို နယ်မြေစိမ်းမှာတနေကုန်ထားခဲ့ဖို့စိတ်မချလို့ပါ။ အဖေ့မှာသိပ်သံယောဇဥ်ရှိတဲ့ BSA ဆိုင်ကယ်တစ်စီးရှိပါတယ်။ ကျမကလဲ အဖေကဆိုင်ကယ်တိုင်ကီပေါ်တင်ပြီး စက်နှိုးလိုက်တာနဲ့ပျော်တာလေ။

ညနေအဖေပြန်လာကြိုတဲ့တစ်နေ့ကျတော့၊အမေ့ခမြာဟံသာဝတီအဝိုင်းမှာဆိုင်ကယ်ပေါ်ကကျကျန်ခဲ့တာဗဟန်းအိမ်ရောက်မှ မိန်းမပါမလာမှန်းသိတော့တယ်။

ကံကောင်းလို့မကျိုးမပဲ့တာ။အဖေကစိတ်မချလို့ကြည့်မြင်တိုင်အိမ်ကိုနေ့တိုင်းပို့ထားတာအကဲပိုရန်ကောလို့တွေးမိကြပါလိမ့်မယ်။

မပိုပါဘူးနော်။အကြောင်းတိုက်ဆိုင်တာလား၊ကံကိုကပါလာတာလားမသိတော့ပါဘူး။

မိုးကြီးလေကြီးကျတဲ့တစ်နေ့ အဖေကလည်းပြန်မရောက်သေး။

အမေက ကလေးကိုဖက်ထားပြီးအိမ်ရှေ့လေးမှာထိုင်နေတုန်း၊အဖေကဆိုင်ကယ်ကြီးနဲ့ပြန်ရောက်လာတာ သားအမိနှစ်ယောက်ကိုဘုရားမလိုက်သလိုပါဘဲ။ မိုးထစ်ချုန်းသံနဲ့အတူနောက်ဖေးဖက်က”တောင်”ပြိုကျတာ။ အမေကသေတ္တာလေးကိုအိမ်ရှေ့တော့ဆွဲထုတ်လာပါရဲ့၊မိုးထဲလေထဲကမန်းကတမ်းဘာပစ္စည်းမှမယူနိုင်ဘဲ သားအဖသုံးယောက် အဖေ့သူငယ်ချင်းဦးလေးကိုစိန်ဝင်း (ကပ္ပလီကွက်သစ်)အိမ်ကိုပြေးကြရတာ။

မနက်လင်းလို့အဖေကကျမတို့အိမ်လေးကိုသွားကြည့်တော့ မှန်အိမ်မီးလေးက မငြိမ်းသေးဘူးတဲ့။ အိမ်ရှေ့လေးဘဲကျန်ပြီးအနောက်ခန်းတစ်ခုလုံးမြေပြိုကျတဲ့ထဲမှာပိပြားလို့။ သော့လေးဖွင့်ပြီး အိမ်ရှေ့ခန်းကသေတ္တာလေးကိုဆွဲ၊မီးလေးငြှိမ်းလို့ အဖေ့ခမြာကျမတို့သားအမိဆီကိုပြန်ရောက်တော့ “ကံကြီးပေလို့မသေတာ”လို့တစ်ခွန်းဘဲပြောနိုင်တယ်ဆိုတာအမေပြောပြတာပါ။

အော် ကျမအမေလဲ တရားရှာနိုင်ဖို့အသက် ၉၆နှစ်အထိနေဖို့ ကံပါလာဖြစ်ပါလိမ့်မယ်။

ဒီလိုမျိုးလေးတွေးမိရင်တော့လဲ အမေ့အတွက်ဖြေသာမိပါသေးတယ်လေ။

ငြိမ်းငြိမ်းက မြင်းလှည်းကြီးနဲ့ဦးလေးအိမ်ကိုရောက်လာပြီး၊ဥယျာဥ်လမ်းအိမ်ကိုပြောင်းပေးခဲ့တာ။

ဥယျာဥ်လမ်းဆိုတာ စကားဝါပင်လမ်းနဲ့ကပ်ရက်လမ်းပါဘဲ။

မိသားစု ၄ ယောက်ဖြစ်သွားပါပြီ။ညီမလေးကကျမထက် ၅နှစ်ခွဲငယ်ပါတယ်။ဒါပေမဲ့သူကဥာဏ်ပိုကောင်းတော့ ခုချိန်အထိဆရာသိပ်လုပ်တာ။ငယ်ငယ်ကတော့သူ့ကိုအရုပ်လေးရသလိုမျိုးမို့ ကျမလုပ်ပေးသမျှခံတာပါဘဲ။

အခြေမကျသေးသမျှ ဟိုရွှေ့ဒီပြောင်းနဲ့။

မွေးစကနေအိုသည့်တိုင်အောင် သောကဆိုတာဘာမှန်းမသိတဲ့လူတွေ သိပ်ကံကောင်းကြပါလားလို့လဲတွေးမိပါတယ်။

ဒေါ်မိအောင် Daw Mi Aung

“မေမေရေ လာပါတော့ကျီးကန်းလေးကတမော့မော့”

ကျမရဲ့အမေကသူရဲကြောက်တတ်တယ်။

မြန်မာမိသားစုမိဘတွေဟာ များသောအားဖြင့်ကိုယ့်သားသ္မီးကိုအရွယ်ရောက်လို့အိမ်ထောင်ထူတဲ့အချိန်မှာတောင် မျက်စေ့အောက်မှာရင်အုပ်မကွာထားချင်တတ်ကြတယ်။(မှားယွင်းတဲ့အယူအဆများလားလို့တွေးမိပါတယ်။)

အဖေနဲ့လက်ထပ်ပြီး ယောင်နောက်ဆံထုံးပါအဖေ့မိသားစုထဲကိုဝင်ခဲ့ရတဲ့အမေ။

အဖေတို့ကအမေရယ်ညီအစ်ကိုလေးယောက်ရယ်မှာအဖေကသားအထွေးဆုံးမို့ ရွှေပေါ်မြတင်ပေါ့။ အဖွားကသားတွေ၊ချွေးမတွေ မြေးတွေနဲ့အတူနေ အတူစား။

ချွေးမတွေကတစ်ယောက်တစ်လှည့်စျေးဝယ်ရတယ်။

ကျန်တဲ့သူတွေကဝိုင်းချက်ကြရပါတယ်။

တကယ်ကိုပျော်စရာပါ။

အဖေက နောက်ဆုံးမှအိမ်ထောင်ကျတဲ့သူမို့အတွင်းဖက်ဆုံးအခန်းမှာနေရပါတယ်။ အဖေတို့ခြေရင်းအိမ်မှာက ကက်ဝိုင်းရှိပါတယ်။(ဖဲလိုကစားရတဲ့ အပွင့်လေးတွေပါတဲ့သစ်သားတုံးမဲမဲလေးတွေ)

တစ်ညတော့အဖေက ခြေရင်းအိမ်ရောက်နေပါရော။ အမေကလဲအိမ်ထဲမဝင်ရဲ။အဖေ့ကိုလှမ်းခေါ်တော့ အဖွားက “ပြန်လာမှာပေါ့၊ခေါ်မနေနဲ့” လို့ပြောသတဲ့။ ထပ်ခါထပ်ခါခေါ်လို့ အဖွားကလဲထပ်ခါထပ်ခါပြောပါလိမ့်မယ်။ အဲ့ဒီတော့ အိမ်မှာရွှေလိုဥထားခံရတဲ့ အမေကလဲ “ကိုယ့်ယောကျာ်းကိုယ်ခေါ်တာ” လို့ပြန်ပြောတယ်တဲ့။

သားတွေကအမေကိုသိပ်ချစ်ကြပြီး မော်လို့တောင်မကြည့်ကြတာမို့၊ အဖေ့အထက်က အကိုကအဖွားကိုပြန်ပြောရမလားဆိုပြီး ပန်းထိမ်ဖိုက တူသေးသေးလေးနဲ့ထုမလို့။ အဖေကပြန်ပြေးလာပြီးသူ့အကိုကို “မင်းဝင်မပါနဲ့” လို့ပြောတာပေါ့။

(ကျမကအသက် ၃နှစ်ကျော်ကျော်လောက်ရှိပြီထင်ပါရဲ့။

မှတ်မိတာကတော့ ဘကြီးအကြီးဆုံးရဲ့သ္မီးမမမတင်ဦးကချီပြီးချော့တာလေး။

ဝမ်းကွဲမောင်နှမတွေအားလုံး ခုထိချစ်ကြတုန်းပါ။)

အမေ့ကိုချမယ်လို့ပြောတဲ့အဖေချစ်လှိုင်ရဲ့မိန်းမအမေညွန့်ကြည်ကဆုံးပြီးကာစမို့ အိမ်ထဲမဝင်ရဲတာနေမှာပါ။

သူရဲကြောက်တတ်သူမို့။

အိမ်ခန်းထဲရောက်တော့အမေကဆင်းမယ်ဆိုရင်းအဖေကဆွဲထားရင်းနဲ့၊မနက်မိုးလဲလင်းရောကျမကိုချီ၊သေတ္တာကိုဆွဲပြီးအဖေ့အိမ်ပေါ်ကဆင်းတာ။

အမေနဲ့ညီအစ်ကိုတွေထိုင်ပြီး မနက်အစောစာစားနေတုန်းမို့ အဖေကလဲ ထမဆွဲရဲဘဲ၊”ငါ့ကလေးထားခဲ့”လို့ဆိုသတဲ့။

အမယ်လေး ကျမရဲ့အာဂအမေက” ရော့၊နင့်ကလေး” ဆိုပြီးပစ်ချပေးခဲ့တာ။

(သနားစရာကောင်းလိုက်တဲ့သ္မီးလေး)

အမေနဲ့အဖေက တစ်လမ်းထဲနေကြတာ။နောက်နေ့တွေကျတော့မနက်အစောစာ စားပြီးတာနဲ့၊ကျမကိုအဖေက အမေ့အိမ်ကိုလွှတ်လိုက်တာ။

(လျှော်ဖို့အဖေ့အဝတ်ရယ်၊ကျမကိုရေမိုးချိုးပေးပြီးလဲတဲ့အဝတ်ရယ်နဲ့။)

ရယ်စရာတော့ကောင်းသား။

အမေကချက်ချင်းဘဲ စွပ်ကျယ်စက်ရုံမှာအလုပ်ဆင်းတာ။ကျမကတော့တစ်နေကုန် အမေ့ရဲ့အမေနဲ့ကျန်ခဲ့ရတာ။အခြားအမေ့မောင်အိမ်ထောင်ကွဲတွေလဲအတူနေပေါ့။ကလေးဆိုတော့လဲနေနဲနဲညိုတာနဲ့ အမေ့ကိုတမ်းတပြီးမျှော်ရတာ။ အဲ့ဒီအဖြစ်လေးကိုတော့ ရင်ထဲမှာအမှတ်ရနေမိတာ။

အမေပြန်လာလို့ သ္မီးလေးကသံဇကာလေးကိုကိုင်ပြီး “မေမေရေ လာပါတော့ကျီးကန်းလေးကတမော့မော့” ဆိုတာမြင်ရင်အမေကမျက်ရည်ကျတယ်။တကယ်တော့ ချစ်လို့အတူတူသစ္စာတွေတိုင်ပြီး အိမ်ထောင်ပြုကြတာ ရန်ဖြစ်ကြ၊ကွဲကြဖို့မှမဟုတ်တာ။

ဒါကြောင့်သားသ္မီးတွေ အရွယ်ရောက်လို့ အိမ်ထောင်ထူကြရင် အိမ်ခွဲပေးလိုက်သင့်တာ။

အဖေနဲ့အမေပြန်ပေါင်းဖို့ကျမကအောင်သွယ်တော်လေ။

အမေကကိုယ့်အိမ်နဲ့ကိုယ်နေကြမယ်ဆိုမှပြန်ပေါင်းမယ်ဆိုလို့၊ ဗဟန်း ရေတာရှည်လမ်းမှာပြောင်းနေကြပါတယ်။

တော်ပါသေးရဲ့ အမေအဖေနဲ့မောင်ညီမလေးတွေနဲ့ သိုက်သိုက်ဝန်းဝန်းနေခဲ့ရလို့ကျေးဇူးတင်နေရတာခုချိန်ထိပါ။

ကျမကအဖေတို့အမေတို့ရဲ့နှောင်ကြိုးလေးတစ်မျှင်။

ဒေါ်မိအောင် Daw Mi Aung

(ဓါးပြကြည့်ချင်တယ်)၂

မုန့်စားချင်တယ်ဆိုပြီး ငိုတာဆိုရင်လဲမုန့်ကျွေးလို့ရရဲ့။အိမ်ကကုန်စုံဆိုင်ကြီးမို့။

ညောင်စောက်မှာ ပိုက်ဆံလဲချမ်းသာတဲ့ဒေါ်နှင်းမြိုင်မှာ သားတစ်ယောက်ထဲရှိတော့ရိုးလွန်းတဲ့ အမေကြီးနဲ့လက်ဆက်ပေးပြီး၊ မြေးတွေအများကြီးနဲ့နေချင်သတဲ့။ အမေကြီးကလဲကလေးတွေတစ်ကျိတ်လောက်ကိုမွေးတာ။ ကျမသိမှီသလောက်ကတော့အမေတို့မောင်နှစ်မခြောက်ယောက်ပါ။

အဲ့ဒီခေတ်အခါက ညနေ နေမဝင်ခင် ညစာစားကြရပြီး၊ကိုယ့်အိမ်ကိုယ်မအိပ်ရဲဘဲ၊အခြားအိမ်တွေမှာ ကိုယ်ယောင်ဖြောက်ပြီးသွားအိပ်ကြရတာ။တစ်နေ့တစ်အိမ်ပေါ့။ပုံသေလဲသွားပြီးစတဲချလို့မရပါဘူးတဲ့။

အဲ တစ်ခုရှိသေးတာက ကိုယ့်ကိုမိရင် အရိုက်ခံရမှာစိုးလို့ အိတ်ရှုံ့လေးတွေကိုယ်စီမှာ ရွှေတိုရွှေစလေးတွေ ဆောင်ထားကြရသေးတာ။

ပိုက်ဆံချမ်းသာပြီး မအေးချမ်းရတဲ့ဘဝ၊စည်းစိမ်မရှိတဲ့ဘဝတွေမို့ မက်လောက်စရာမရှိပါ လားလို့၊တွေးမိ တရားကျမိပါတယ်။

တစ်ညတော့ ရွာကိုဓါးပြတွေဝင်လာပါရော၊အဖိုးတို့အိမ်ကိုအဓိကပေါ့။ကိုယ်လွတ်ရုန်းပြေးကြရတာ ကလေးတစ်ယောက် ကဓါးပြလက်ထဲကျန်ခဲ့ပြီး၊ကျန်တဲ့သူတွေလွတ်သွားပါတယ်။ရွာကလူစုပြီးလဲလိုက်ကြရော ဓါးပြကအိမ်က ၃၆ ကောင်မုန့်တွေခါးပိုက်ထဲထည့်၊ ကလေးကိုပခုံးပေါ်ထမ်းလို့ “ကလေးပါတယ်၊ကလေးပါတယ်” လို့အော်ပြီးပြေးတာ၊ရွာထိပ်က မုန့်ပြားသလက်သည်ဆီရောက်မှကလေးကိုအသေအချာအပ်ခဲ့တာ။

(ကလေးမှာလက်ကောက်ဘယ်နှစ်ကွင်း၊နားဋောင်း၊ဆွဲကြိုးစာရင်းနဲ့) ၃၆ ကောင်မုန့်က ကလေးကိုကျွေးဖို့ယူလာတာ။

ကလေးရော ပစ္စည်းရောကို အသေအချာပြန်မပေးရင် သတ်ပစ်မယ်ဆိုဘဲ။

သစ္စာရှိကြပါပေရဲ့။

အချိန်သိပ်မကြာခင်ဘဲ ဓါးပြတွေမိတယ်ဆိုလို့၊ဓါးစာခံပါသွားတဲ့ကလေးကို သက်သေခေါ်ပါရော။

အဖိုးကအသေအချာမှာပါတယ်။ “သ္မီးရေမသိဘူး၊မမှတ်မိဘူး ” လို့ပြောနော်လို့။

အဖေ့စကားနားထောင်လိုက်တာမှ အသေအချာကို “သူ့ကိုချီသွားတာဒီလူ၊ဘေးကပါလာတာကဒီလူ”ဆိုပြီး၊ ဂတ်အဝရောက်ကထဲကပြောတော့တာပါဘဲတဲ့။မှတ်ကရော။

အဖိုးလဲဒီမှာဆက်နေလို့တော့မဖြစ်ဘူးဆိုပြီး၊ညောင်တုန်းမှာပြောင်းနေကြရပါရော။

နှစ်တွေကြာလို့ ရန်ကုန်ရောက်တော့ အဖိုးတို့အိမ်ကိုတိုက်တဲ့ဓါးပြကြီးက ဘုရားဒကာအမည်ခံသူဌေးကြီးဖြစ်လို့။

ကလေးကိုလဲမြင်မြင်ချင်းမှတ်မိပြီး”Sကောင်မလေး ငါသာသတ်ပစ်လိုက်ရင် သေပြီ”လို့ပြောသတဲ့လေ။

တွေးကြည့်တော့ သူကလူမသတ်ခဲ့ဘူး၊ဓါးပြဖြစ်ခဲ့ပေမဲ့သစ္စာရှိတယ်၊ဒါတွေကြောင့်လဲ လက်ရှိမှာ လူရိုသေ၊ ရှင်ရိုသေဘဝတစ်ခုရခဲ့တယ်လို့ထင်မိပါတယ်။

ဓါးပြ ကြည့်ချင်သူကတော့ ကျမရဲ့မာတာမိခင်ဒေါ်ခင်မေ ပေါ့ရှင်။

ဒေါ်မိအောင် Daw Mi Aung

ဖက်ဖူးရောင်လေးနဲ့သိပ်လှတာဘဲလို့ဘယ်သူပြောခဲ့တာပါလိမ့်။

ဒီလိုနဲ့ဘဲတို့အမေ အိမ်ထောင်ရှင်မဖြစ်ခဲ့တာ။သ္မီးအကြီးဆုံး၊အလိုလိုက်ခံရဆုံးမို့ မီးဖိုချောင်ဝင်တာက အမေနဲ့အဝေးကြီး။သို့သော်လဲ ယောကျာ်းကိုကျွေးချင်တဲ့စိတ်စေတနာအပြည့်ဖြစ်မယ်ထင်တာပါဘဲ။

အမေ့အဒေါ်ရဲ့ယောကျာ်းနဲ့အဖေနဲ့ကသူငယ်ချင်း(ထန်းတပင်သား)တွေ၊သိပ်လှတာဘဲလို့ပြောတဲ့အသံတွေအမြဲကြားနေရတာမို့ကြွေပြီပေါ့။

(လှတယ်လို့ပြောရင် မကြိုက်ဘူးဆိုတဲ့မိန်းမမရှိဘူးလေ။)

အမေကြီး(အဖွား)က သိပ်ရိုးတာ။အဖိုးဆုံးတော့သ္မီးသုံးယောက်၊သားသုံးယောက်နဲ့ ပင်ပမ်းရှာတယ်လို့အမေပြောဘူးတယ်။

အမေတို့ညီအစ်မသုံးယောက်က ဘော်လီချုပ်ကြရ။ ဒီလိုနဲ့တို့အမေလဲအိမ်ထောင်ကျတော့ အဖေ့ကိုအမေတို့ မိသားစုက ဝိုင်းချစ်ကြတာ။

ဇာတ်လမ်းက ညီအစ်မသုံးယောက် မချက်တတ်ချက်တတ်နဲ့အမေကဝက်သားချဥ်ဟင်း၊ အဒေါ်အလတ်ငြိမ်းငြိမ်းကငပိဆီကြော်နဲ့အဒေါ်အငယ်ဆုံးစိန်စိန်ကကင်ပွန်းရွက်ဟင်းချိုတဲ့။

စားချင်စဖွယ်ထမင်းဝိုင်းလေးပေါ့။

(ကျမတို့က အဒေါ်တွေရဲ့နံမည်အဖျားလေးတွေကိုခေါ်တတ်တာပါ။ဝဍ်လည်တတ်တယ်ဆိုတာလေ ခုလဲတူမတွေက ကျမတို့ညီအစ်မကို မိမိ၊မြင့်မြင့်လို့ခေါ်ကြတာ။)

ကြည့်မြင်တိုင်အိမ်က အိမ်ရှေ့မှာထမင်းဝိုင်းပြင်ပြီးစားကြတော့ လမ်းမပေါ်ကလှမ်းနှုတ်ဆက်လို့၊စကားလှမ်းပြောလို့ရပါတယ်။

ဦးချိန်အေး(အမေ့အဒေါ်ယောကျာ်း၊အဖေ့သူငယ်ချင်းက စပ်စပ်စုစု”အောင်ကြည်ရေဘာဟင်းတွေလဲကွ” ဆိုတော့၊အဖေက “လာစားလေ ~မင်းတူမချက်တာ”တဲ့။

ဘဘက ဝက်သားဟင်းကို ယူစားပြီး၊ “အမယ်လေး ခင်မေရယ်ချဥ်လှချည်လား “လို့ပြောသတဲ့။

(အဖေတို့များမိန်းမကိုချစ်လိုက်တာ။ နောက်ပိုင်း သူကိုယ်တိုင်ချက်ကျွေးတော့တာ။ ရုံးအလုပ်လဲလုပ်ရသေးတယ်။ ကျမအထင်တော့ တာဝန်ယူတတ်တဲ့ယောကျာ်းမို့ပါ။)

အမေကဝက်သားအစိတ်သားကိုရှောက်သီးတစ်လုံးညှစ်ထဲ့ပြီးချက်သတဲ့။ငြိမ်းငြိမ်းရဲ့ငပိဆီကြော်ကတူးတူးခါးခါးလေးနဲ့စိန်စိန်ရဲ့ကင်ပွန်းချဥ်ဟင်းကကင်ပွန်းသီးပြုတ်နံ့တထောင်းထောင်းပါတဲ့။ ဒါပေမဲ့ စေတနာမေတ္တာအပြည့်နဲ့ချက်ကျွေးကြရှာတာပါ။

အဖေကလဲ မကောင်းဘူးလို့ပြောကိုမပြောတာ။

တစ်ဦးမေတ္တာ တစ်ဦးမှာဆိုတာသိပ်မှန်တာဘဲ။

အဖေပြောတဲ့ဖက်ဖူးရောင်မိန်းမချောလေးရဲ့ချစ်ခြင်းမေတ္တာဟာတကယ်တော့အတိုင်းအဆမရှိပါဘူး။

ဒေါ်မိအောင် Daw Mi Aung

ဒီမနက်တော့ဟင်းချက်ရင်းနဲ့အမေ့ကိုသတိရသွားလို့ပါ။

သားသ္မီးနဲ့လင်ယောကျာ်းကိုဦီးစားပေးတတ်တာမို့အတုယူထားတာလေးထဲကတစ်ခုပေါ့။

အဖေကနိုင်ငံရေးသမားမို့ ၁၉၆၂ခုနှစ်အာဏာမသိမ်းခင်အချိန်ကစလို့ရုံးကလစာမပေးနိုင်ပါဘူး။

သိမ်းပြီးနောက်ပိုဆိုးတာပေါ့လေ။

ဒီကြားထဲမှာသ္မီးကြီးကို Convent ကျောင်းမှာထားတော့ ကျောင်းလခ(၁၅/-)ကျောင်းကားခ(၁၀/-)စရိတ်ကလစဥ်။

အမေကလေ ရှပ်အင်္ကျီကြယ်သီးပေါက်ချုပ်တာတစ်ကျပ်တစ်မတ်လောက်ရရင်၊ အမဲသားတစ်ဆယ်သားပြား၃၀၊ ဆီတစ်ဆယ်သား၃၅ပြား၊ခရမ်းချဥ်သီးလေးဆယ်ပြားဖိုးနဲ့ အသားလေးကိုနုတ်နုတ်စင်းလို့ကြက်သွန်နီ၊ခရမ်းချဥ်သီးတို့နဲ့ စင်းကောလေးချက်တာပါ။ အဲ့ဒီဟင်းတစ်ခွက်ကိုအဖေ့အတွက်ခူးခပ်ပြီး၊အိုးလူးခွက်လူး အသားဟင်းလေးစားကောင်းအောင် ထည့်ပြီး ကျမတို့ညီအစ်မနှစ်ယောက်ကိုခွံ့ကျွေးတာ။

ခုထိဒီအရသာလေးကိုမမေ့နိုင်ပါဘူး။

အဖေ အလုပ်မလုပ်ဘူးလားလို့မထင်လိုက်ကြပါနဲ့။အာဏာသိမ်းပြီးနောက်တစ်နှစ်ကျော်လောက်အထိ စောင့်ကြည့်ခံထားရတာ အဖေဘယ်သွားသွား၊ဘယ်လာလာပေါ့။

တကယ်တော့ဥပဒေနဲ့မလွတ်ကင်းတာဘာဆိုဘာမှမလုပ်ခဲ့တဲ့ အဖွားရဲ့ပိုက်ဆံနဲ့နိုင်ငံရေးလုပ်ခဲ့ကြတာပါ။

(အဖေတို့ညီအစ်ကိုလေးယောက် နိုင်ငံရေးလုပ်လိုက်ကြတာ၊ရွှေဆိုင်နဲ့ပန်းထိမ်ဖိုပါပြောင်ရော)

အမေကကုန်သည်သားသ္မီးဆိုတော့စီးပွါးရေးအမြင်ရှိတယ်လေ။

အဲ့ဒီအချိန်ကကုန်ပစ္စည်း၃၇မျိုးလားကန့်သတ်လိုက်တော့ – – – –

နောက်မှဆက်ရေးမယ်နော်။

လင်သားနဲ့သားသ္မီးဟာ သူ့ဘဝအတွက် အရေးအကြီးဆုံးလို့ခံယူထားတာကျမတို့အမေပါ။

ဒေါ်မိအောင် Daw Mi Aung

ဒီနေ့ ကွန်ဗင့်ကျောင်းသူဖြစ်တဲ့နေ့ပေါ့။

အဖေကမနက်စောစော ရေမိုးချိုးသနပ်ခါးလိမ်းပေးပြီး၊ အင်္ကျီကိုလည်းကျကျနနဝတ်ပေး၊ကုလားထိုင်ပေါ်မှာကျမကိုတင်ပြီးဖိနပ်စီးပေးတာ ဘယ်တော့မှမမေ့နိုင်ပါဘူး။သ္မီးအကြီးဆုံးမို့ တော်စေ၊တတ်စေချင်တာ အရမ်းကိုပါဘဲ။ (အဖေ ရည်မှန်းသလောက်တော်တဲ့အထဲမှာ ကျမက”စံ”မဝင်လို့ ၊ခုချိန်ထိအဖေ့ကိုတောင်းပန်နေရပါတယ်။)

St. Philomena’s Convent ကိုကျောင်းစတက်တော့Middle Kg. Teacher Mrs. Ba Ba ရဲ့အတန်းမှာပါ။ ပထမဦးဆုံးရတဲ့သူငယ်ချင်းအသစ်လေးကတော့ အလွန်သွက်လှသောPansy Nyi (မိမိအေးအေး) ပေါ့။

{ကျမကဌာနာလမ်းထိပ်ကကျောင်းယ္ခုအထက(၅)ကြည့်မြင်တိုင်ကဒုတိယတန်းအောင်ပြီးကျောင်းပြောင်းခဲ့တာ။ကွန်ဗင့်ကျောင်းကျတော့ဘာသာစုံအင်္ဂလိပ်လိုသင်ခဲ့ရတယ်။ ဒါပေမဲ့ ကျောင်းတွေကိုပြည်သူပိုင်လဲသိမ်းလိုက်ပါရော ၅တန်းကျမှအင်္ဂလိပ်စာပြန်သင်ကြရတော့တာ။ အထက်မကျ၊အောက်မကျနဲ့ ဂွကျကျဖြစ်ရတာပါဘဲ။}

အရင်ကျောင်းကကျမရဲ့သူငယ်ချင်းတချို့ကတော့ကျမထက် ၂နှစ်လောက်စောပြီးဘွဲ့ရကုန်ကြတာ။

ဒါကြောင့်မို့ ဘယ်ကျောင်းမှကောင်းတယ်၊စာလဲသင်တာကောင်းတယ်လို့မယူဆစေချင်ပါဘူး။

ကျမညီမလေးက အထက(၅)ကဘဲ၁၀တန်းအောင်တော့ဓါတုဗေဒတောင်ဂုဏ်ထူးရပါသေးတယ်။ ပေးတဲ့သူဆီက ရအောင်ယူတတ်ဖို့အဓိကပါ။

Higher KG (Tr.Mrs.Ba Sein.), 1st. Std: (Tr. Mabel), 2nd.Std:(Tr. Parli Mra Tun.) တို့ရဲ့အတန်းတွေမှာပညာသင်ခဲ့ရပြီး တတိယတန်းမတက်ရဘဲစတုတ္ထတန်းကို ကျမ၊ Pansy, Sheila Tun Mg, Daisy Saw, Dolly Sein)တို့တက်ရတာပါ။

အဖေကတေ့ာသူ့သ္မီးတော်လှဆိုပြီးသဘောတွေကျလို့။စတုတ္ထတန်းတက်တဲ့နှစ်ဘဲ ကျောင်းကပြည်သူပိုင်အသိမ်းခံလိုက်ရတာပါ။ သိပ်ချစ်စရာကောင်းပြီးကျက်သရေရှိလှတဲ့ Tr. Dorothy ရဲ့အတန်းမှာတက်ရပါတယ်။

အဖေကအလှအပကြိုက်သလောက် အမေကသနပ်ခါးလိမ်းတာကလွဲလို့ လုံးဝအလှမပြင်ပါဘူး။နဂိုချောမို့သာတော်တော့တယ်။ တို့ပတ်ပုဝါတောင်အဖေလုပ်ပေးတာ။စွပ်ကျယ်အပိုင်းလေးကိုသန့်အောင်လျှော်၊သနပ်ခါးရည်လေးထဲနှစ်လို့ နေရိပ်မှာခြောက်အောင်ထားရပါတယ်။(နေပူမှာလှန်းရင် တင်းတိတ်ဖြစ်တတ်သတဲ့။) ဒေါ်ခင်မေတို့ကမင်္ဂလာဆောင်တဲ့တစ်ခါ၊ကျမဘွဲ့ယူတော့တစ်ခါနဲ့မှနှစ်ခါဘဲနှုတ်ခမ်းနီဆိုးဘူးတာ။

ကျမနဲ့တော့လုံးဝမတူ။ (အဖေကနှုတ်ခမ်းနီဆိုးပေးရင် သ္မီးရေပါးစပ်လေးကို’အို’လို့ဆိုပြီးမှ ဟထားတဲ့နှုတ်ခမ်းကိုဆိုးရတယ်လို့သင်ပေးတာ။)

တော်ဝင်သူအမေ စပြီးရုန်းကန်ခဲ့ရတဲ့နှစ်ပါဘဲ။

အမေ့ခမြာမှာအဖေစိတ်ဓါတ်မကျရအောင်၊ပင်ပမ်းတကြီးကြိုးစားရုန်းကန်ခဲ့ရတာ၊အဖေလဲပြန်ပြီးစီးပွါးရေးလောကထဲဝင်လို့အတော်လေးအထိုင်ကျရော အဖေကဆုံးတော့တာပါဘဲ။

အဖေမဆုံးခင်စီးပွါးရေးအဆင်ပြေတုန်းအချိန်မှာဘဲမောင်လေးအောက်ညီမလေးတစ်ယောက်မွေးပါတယ်။မိမာပါ။

ညီမလေးကတစ်နှစ်သ္မီးလောက်မှာနေမကောင်းဖြစ်နေတုန်း ငရုတ်သီးညှော်မိတာ၊ ရင်ကလဲကြပ်တော့ကမန်းကတမ်းဆေးရုံပြေးတော့။ဆုံဆို့နာဖြစ်တာမို့လည်ပင်းမှာအပေါက်ဖေါက်ပြီး ကန်တော်လေးကကူးစက်ဆေးရုံမှာ ၃လနီးပါးပါဘဲ။ မသေလို့သာပါ။ အမေကအပြုအစုကောင်းတာလဲပါသမို့။လည်ပင်းကအပေါက်လေးကချွဲဆို့သွားရင်သေတတ်တာမို့တချိန်လုံးကြည့်နေရရှာတာ။ အိမ်သာသွားရင်တောင်ချီသွားပြီးလည်ပင်းကအပေါက်ကိုကြည့်နေရတာ။

ဘဝ ဆိုတာ အတက်အကျအနိမ့်အမြင့်တွေများလွန်းလှပါတယ်။

လူတွေဟာဘာဖြစ်လို့များ လောဘ မာန်မာနတွေဖုံးလွှမ်းနေကြပါလိမ့်။ မသိမှုအဝိဇ္ဇာတွေဖုံးလွှမ်းနေကြတာသနားစရာပါ။

ကျမအဖေဆိုလုပ်ငန်းတွေလဲအဆင်ပြေ၊သားသ္မီးတွေပြည့်ပြည့်စုံစုံ (မိမာမွေးပြီးမောင်လေးဖိုးချိုလဲအပါအဝင်၊မောင်နှမ ၅ ယောက်) နဲ့သိပ်ပျော်ခဲ့ရှာတာပါ။ ဒီကြားထဲမှာ တနင်္ဂနွေနေ့ဆို အမေ့ရဲ့မောင်နှမတွေကမွေးတဲ့ကလေးတွေအားလုံးကို အမျိုးမျိုးမရိုးရအောင်ကိုယ်တိုင်ချက်ပြုတ်ကျွေးမွေးရင်းပျော်နေတာ။ကံကြမ္မာက ရက်စက်လာတော့ – – – ခဏပျော်ပေါ့လေ။

ဒေါ် မိ အောင် Daw Mi Aung

စွဲလန်းတယ်ဆိုတာ ဘာကိုစွဲလန်းတတ်တာမှ မကောင်းပါဘူး။ မသိဘူးလားဆိုတော့သိကြပါတယ်။ ဒါပေမဲ့လို့ အတ္တလို့ဘဲ ခေါ်လေမလား။ စိတ်အလိုလိုက်နေမိကြတယ်လို့ဘဲခေါ်လေမလား။

ကိုယ်ကြိုက်တဲ့ပစ္စည်းသေးသေးမွှားမွှားလေးကအစ ဟောင်းနွမ်းလို့၊ သုံးမရတော့ဘူးဆိုရင်တောင်မှ လွှင့်မပစ်ရက်ဘဲ၊ ဒီ ပစ္စည်းလေးက ဘယ်ကရတာ၊ ဘယ်သူပေးထားတာ ဆိုတာမျိုးလေးကိုတသသ ပြန်တွေးရင်းနဲ့အနှစ်နှစ် အလလစွဲစွဲ လန်းလန်း သိမ်းထားတတ်ကြတာ။ ” စွဲလန်းမှု ” တဏှာ တွေပါလား။

ကျမကို သူများတွေကပြောကြတယ်။ “မှတ်ဥာဏ်ကောင်းလှချည်လား ” တဲ့။ ပြန်တွေးကြည့်ရင် ရှက်မိသလိုပါဘဲ။ နောက် ကြောင်းကို ပြန်တွေးပြီး “ဖြစ်ကြောများရှည်” နေလေရော့သလားလို့ပါ။ သူတော်ကောင်းတွေ ကြောက်တဲ့ အလုပ်တွေပါ။

ငယ်ငယ်တုန်းက ဆရာမကကျောင်းခန်းထဲမှာ စကားမပြောရဘူးဆိုရင် တယ်ပြောချင်ကြတာကိုး။ (ကျမတို့ရဲ့ အတန်းခေါင်း ဆောင် မိမိအေးအေး ကဆို ၊”စကားမပြောနဲ့နော်၊ပြောရင်တီချယ်နဲ့တိုင်မယ်” ဆိုတာချည်းဘဲ။) ဘာရမလဲ၊ စာရွက်လေးမှာ စာရေးပြီးပြောကြရတာ သိပ်ပျော်စရာကောင်းခဲ့တာ။ အဲ့ဒီလိုရေးပြီးစကားပြောခဲ့ကြတဲ့ စာရွက်အပိုင်းအစလေးတွေကအစ ကျမမှာရှိခဲ့ဘူးပါတယ်။ စာအိတ်လေးတွေနဲ့အစီအရီထည့်သိမ်းထားခဲ့တာ။ ကလေးဘဝများ အပူအပင်ကင်းစွာနဲ့ ရှာကြံပြီး ပျော်စရာဖန်တီးတတ်ကြတာ။ (နာဂစ် မွှေလိုက်လို့သာ နှမျောတသစွာနဲ့ လွှင့်ပစ်လိုက်ရတာပါ။ ငယ်ငယ်ကဓါတ်ပုံလေးတွေဆို ပြန်ကြည့်လို့ကို အဆင်မပြေတော့တာမို့ပစ်လိုက်ရပါတယ်။)

ဝတ်လို့ကို မတော်တော့တဲ့အင်္ကျီဆိုရင်လဲ၊ အထူးသဖြင့် လက်ဆောင်ရထားတာလေးဆိုရင် သူများလဲမပေးရက်၊ လွှင့်လဲမပစ် ရက်၊ကိုယ်လဲဝတ်မရနဲ့၊ အဝတ်အစားတွေရှင်းတဲ့အခါတိုင်း ကိုင်ကြည့်လိုက်၊ပြန်သိမ်းလိုက်နဲ့ ရှုပ်နေတော့တာပါဘဲ။ (အိမ်မှာအမှိုက်ပုံကြီးကိုဖြစ်လို့ပါ။) အဖေတို့၊မောင်လေးတို့ ရဲ့ကျန်နေတဲ့ပစ္စည်းလေးတွေဆိုရင်လဲ ဒီလိုပါဘဲ။ တကယ်တော့ လူတွေတောင်မရှိတော့တာချည်းကိုကျမတို့ကစွဲလန်းနေမိတာပါ။

ကျမတို့အမေ (5 – 2 – 2021)မှာကွယ်လွန်သွားတော့မှဘဲ၊ ကျမရဲ့ အစွဲအလန်းလေး အတန်အသင့်ပျောက်သွားတော့တယ်။ အမေ့ပစ္စည်းလေးတွေကိုတစ်ခုပြီးတစ်ခုသင့်သလို ပေးပစ်နေမိတာ။ အမေလဲ ကုသိုလ် ရအောင်လို့ပါ။ ဒါတွေသိမ်းထားလို့လဲ အမေက ပြန်ရှင်လာမှာမှ မဟုတ်တော့တာနော်။

ကျမရေးခဲ့ဘူးပါတယ်။ အဖေ ကျန်ခဲ့ပြီးအမေကသာ အရင်ကွယ်လွန်သွားခဲ့မယ်ဆိုရင်လို့ – -ကျမရဲ့အဖေက လူချော လူခန့် မိန်းမတွေ ကျလောက်တဲ့လူမို့ နောက်မိန်းမများယူလေမလားလို့ စဥ်းစားခဲ့ဘူးပါတယ်။ ဟင့်အင်း၊ ကျမတော့ မထင်ပါဘူး။ အဖေက သူ့သားသ္မီးတွေကို ထားစရာမရှိအောင်ကိုချစ်တာ။ ဘယ်တော့မှ လက်လွတ်စပယ် ထားတတ်တဲ့လူမျိုးမဟုတ်ပါဘူး။ သူ့သားသ္မီးတွေကို အမေအရင်းနဲ့တောင်မှ စိတ်မချတာလေ။

နောက်ပြီး၊ အဖေက သူ့ရည်းစားတွေ အများကြီးထဲက အမေ့ကို မြတ်မြတ်နိုးနိုး ယူထားခဲ့တာ။ ဘယ် အစားထိုးလို့ ရနိုင်ပါ လိမ့်မလဲ။ အဖေကလဲ အစွဲအလန်းကြီးတဲ့သူဘဲလေ။

ပြီးတော့ ကျမတို့ ငယ်ငယ်က အော်တိုစာအုပ်လေးတွေထားခဲ့ကြတာမို့၊ ကျမရဲ့စာအုပ်လေးထဲမှာ ကျမရဲ့ သူငယ်ချင်း ကြည် ကြည်အေး (Gay Khin Mg Aye) က “မမြဲမှန်းသိရင် အစွဲအလန်းမကြီးနဲ့ “လို့ရေးပေးဘူးပါတယ်။ ဟုတ်တာပေါ့၊ ဘာကများ မြဲတာရှိလို့လဲ။ ကြည်ကြည်အေးက ငယ်ငယ်ကထဲက တရားရှိတဲ့သူပါ။

အော်၊ တွေးကြည့်ရင် လူတွေဟာ သိပ်ကိုသနားစရာကောင်းကြပါတယ်။ *ရပြီးသား၊ရှိပြီးသားလေးကိုလဲ မစွန့်ပစ်နိုင်၊* မရသေးတာလေးကိုလဲ လိုချင်၊ ဘယ်လောက်များစိတ်ပင်ပမ်းလိုက်ကြလေမလဲ။

လိုချင်တဲ့ လောဘတွေနဲ့ အပြူးအပြဲ ရှာကြဖွေကြနဲ့ ဘယ်မှာများ”ငြိမ်း”တယ်ဆိုတာ ရှိကြလို့လဲ။ ကြောက်စရာကောင်း လိုက်တာနော်။ လောဘဆိုတာလဲ လိုချင်တပ်မက်မှုနဲ့စွဲလန်းမှုကြောင့်ပါ။

အသိလေးနဲ့ သတိလေးထားပြီး တဏှာကိုပယ်လို့ ဆင်ချင်နိုင်ကြရင်တော့ – –

ဒေါ် မိအောင် Daw Mi Aung

အချိန်ကာလများ ကုန်လွယ်လိုက်တာ။ အချိန်တွေ ကုန်သွားသလိုများ လူတွေ၊ ကိုယ်အပါအဝင်ပေါ့ အသိဥာဏ်ပညာ၊အလိမ္မာနဲ့စာနာစိတ်တွေသာ တိုးလာကြမယ်ဆိုရင်ဘယ်လောက်များကောင်းလိုက်မလဲနော်။ မနေ့တနေ့ကလိုဘဲထင်နေပေမဲ့ အမေ ခွဲသွားတာ ဒီနေ့ {2-10-2021}( ၈ )လတင်းတင်းပြည့်သွားပြီ။

ဒီမနက်တော့ ရွှေခြံဓမ္မရိပ်သာကျောင်းကိုဆွမ်းဟင်းဂျိုင့် ပို့ပါမယ်။ မနေ့ ကစျေးဝယ်ပြီးကထဲက ဆိတ်သားကို ဆား နနွင်းနယ်ပြီးဒိန်ချဥ်နဲ့ နှပ်ထားတာ။ ဆိတ်သားဟင်း၊ငါးသလဲထိုးကြော်၊ ကညွတ်ကြော်ချက်လေး နဲ့ ခရမ်းချဥ်သီးပန်ထွေဖျော် လေးပါ။ ကိုယ်နိုင်တဲ့အားလေးနဲ့ အမေ့အတွက်ရည်စူးအလှူလေးမို့ အမေနဲ့တကွ ဝေနေယျသတ္တဝါအားလုံး အမျှ အမျှ အမျှရ၍ချမ်းသာကြပါစေ။

ရွှေခြံဆရာတော် ဘဒ္ဒန္တရဇာဂရိယျ ကအမေ့ရဲ့သိက္ခာထပ်ထားတဲ့ ဆရာတော်ပါ။ သိက္ခာမထပ်ခင်ကထဲက အမေကမောင်လေးဖိုးချိုနဲ့ တူတာမို့သူ့သားလိုဘဲ စိတ်ထဲထည့်ထားရှာတာပါ။ ဆရာတော်ကလဲ ရိပ်သာမှာ အမေက အသက်အကြီးဆုံးယောဂီမို့ ဂရုစိုက်ရှာပါတယ်။ အမေ အသက်၉၀နားကပ်လာကထဲက အမေ့ကိုရိပ်သာဝင်ရင် ဂီလာနယောဂီလို အမေ့အတွက်ညနေစာကို ဝေယျာဝစ္စအဖွဲ့ကိုစီစဥ်ပေးဖို့ မှာထားပါတယ်။

ညီမဝက်ပေါ စိုက်ပျိုးရေးက ပင်စင်ယူတော့၊ သူ့ရဲ့ Gratuity လေးရလာပါတယ်။ “အစ်မရေ ဆရာတော်ကိုသိက္ခာထပ်ရအောင်၊ အမေလဲစိတ်ချမ်းသာအောင်ပေါ့ ” တဲ့။ “ဝက်ပေါရေ ၊အစ်မတို့ ဒီပိုက်ဆံတွေ မရခင်တုန်းကလဲ ထမင်းစားရတာပါဘဲ၊ လှူသာလှူ” လို့လဲ ပြောလိုက်ရော၊ချက်ချင်းကို စီစဥ်ပြီးလှူဖြစ်သွားကြတာ။ ထောပတ်ထမင်း ကို “ရွှေပြည်စိုး”၊ ညီမလေးမျိုးမျိုး တို့ဆီက မှာကျွေးတာပါ။ ကျမတို့သားအမိတွေ ဘယ်လောက်များပျော်လိုက်ကြသလဲဆိုရင်၊ ကိုယ့်ဝမ်းကိုတောင်မဖြည့်မိကြပါဘူးဆို။ ဝက်ပေါကလဲ နှစ်ပေါင်းသုံးဆယ်အလုပ်လုပ်လာခဲတဲ့ သန့်ရှင်းသောပိုက်ဆံနဲ့လှူရတာမို့ ပိုပြီး ကြည်နူးရတာပါ။

အဲ့ဒီနှစ်မှာဘဲ မိုးကုတ်ကိုသွားဖို့ ၊ထုံးစံအတိုင်းကိုတင်ထွန်းတို့ကဆော်သြပြန်ပါရော။ ဝက်ပေါက “အစ်မရေ ကုန်ကုန်ခမ်းခမ်း၊ ဒီတခါတော့ မိသားစုအားလုံးသွားကြမယ်” တဲ့။ – အမေ၊ဝက်ပေါ၊မိမာ၊ သ္မီးသုံးယောက်နဲ့ကျမ – ကိုတင်ထွန်း – ခင်စန်းနု – ကိုပေါက်(မြင့်ခင်)- ရွှေပေါ၊သ္မီးမေသူခိုင် – ဘုရင့်နောင်တာဝါက အန်တီအေး။ – ဘုရင့်နောင်တာဝါက ချိုချိုနဲ့ သူ့သူငယ်ချင်း – အစ်မ မချို၊ – သူငယ်ချင်း မစိန်ရည်။ ဘယ်လောက်များအုပ်စုတောင့်လိုက်သလဲလို့။ ရန်ကုန်ကမန္တလေးကို အဝေးပြေးကားကြီးနဲ့ညကားပေါ့။ ထုံးစံအတိုင်း လမ်းတွေကြပ်နေလို့ ကြည့်မြင်တိုင်ကလာရတဲ့လူတွေက ကားမမှီလို့ ဖုံးတွေဆက်ပြီးရင်တထိတ်ထိတ်နဲ့။ နောက်တော့ မြို့အထွက်က Terminal ဆီဆိုင်ရှေ့ကို အမှီလာခိုင်းလို့ အဆင်ပြေသွားရတာ။ကျမတို့ကတော့ မစိန်ရည်ကို အင်းစိန်၊ ဘိုကုန်းမှာဝင်ခေါ်ပြီး၊ အဝေးပြေးဂိတ်ကိုအချိန် မှီရောက်သွားလို့သာတော်တော့တယ်။

မနက်အစော မန္တလေးရောက်တော့ မိုးကုတ်ကမောင်လေး မောင်သန်းဌေးက ကားနဲ့လာကြိုရရှာတာ။ကားနှစ်စီးနဲ့ မိုးကုတ်ကိုတက်လိုက်ကြတာ။ မိုးကုတ်အတက်လမ်း၊ လက်ပန်လှက ထမင်းဆိုင်ကလဲ စားစရာအစုံရတော့၊ ကိုယ့်အိမ်ကိုယ့်ယာမှာစားကြရသလိုပါဘဲ။ အဲ့ဒီအချိန်က မိုးကုတ်မှာ “တောင်နေကြာတွေပွင့်နေပြီ”လို့ ယောင်းမလေးမခင်ရီကလှမ်းခေါ်တာ။ ဟုတ်ပါ့၊ တောင်စောင်းမှာ ဝါဝါထိန်နေတာလှလိုက်တာ။ ဆတ်စလူးအုပ်စုက – -“တောင်နေကြာပွင့်”တာကို အကြောင်းပြုလို့၊ မိုးကုတ်တခွင် လှည့်လည်လိုက်ကြတာပေါ့။

အသက်အကြီးဆုံးအမေက အေးဆေးပါဘဲ။ ကျမညီမအငယ်မိမာကတော့ မိုးကုတ်သွားတဲ့လမ်းပေါ်မှာ ဗိုက်နာလို့ ၊လမ်းဘေးမှာကားရပ်ခိုင်းပြီး၊ကိစ္စရှင်းခိုင်းရတာ၊ ပြောမဆုံးပေါင်၊တောသုံးတောင် ဆိုသလိုပါဘဲ။သူက ငယ်ငယ်ကထဲက လုပ်ချင်တာလုပ်ရမှ၊ သိပ်သီးမခံတတ်ပါဘူး။ခုဆိုရင်တော့ သူ့သ္မီးသုံးယောက်နဲ့ အမြဲ ပူညံဆူညံပါ။

အမေ့ကို ဆရာတော်ကမလိုက်စေချင်လို့ ကျောင်းမှာဘဲနေခဲ့ခိုင်းတာပါ။ အမေတို့များ မလိုက်ရမှာစိုးလို့ ဆရာတော်ကို “သားရယ် စိတ်မပူပါနဲ့၊ အမေကမိုးကုတ်အထိလိုက်မသွားပါဘူး၊မန္တလေးကအမျိုးအိမ်မှာနေခဲ့မှာပါ” လို့ကျေနပ်အောင် နှစ်သိမ့်ခဲ့သေးတာ။ တရားစခန်းပွဲရက်လဲဖြစ်နေတော့၊ “ဒီလောက်အေးတာ မယ်တော်ကြီးကိုခေါ်သွားရမလား “ဆိုပြီး၊ အပြစ်တင်နေတာတဲ့။ သူ့မယ်တော်ကြီးက ခရီးသွားချင်လိုက်တာမှ” ပြာ”နေတာကိုမသိရှာဘူး။

ကျမတို့ ယောင်းမရတာ ကံကောင်းတာများ၊ မိုးကုတ်အိမ်ကိုရောက်တာနဲ့ မောင်သန်းဌေးနဲ့ဇနီးမခင်ရီက အမေ့ကို သိုးမွှေးဆွယ်တာနဲ့ချည်ကတ္တီပါ လုံချည်ကို ထိုင်ကန်တော့ကြတာ။အမေလဲပါလာမယ် ဆိုတာနဲ့ လျှပ်စစ်စောင်ကအစ ပြင်ဆင်ထားကြရှာတာ။ အိပ်ကြရတာတော့ တိုးတိုးဝှေ့ဝှေ့ပေါ့။ တအားအေးတာနဲ့အတော်ပါဘဲ။

အေးတယ်သာဆိုပါတယ်။အမေကတော့ အစောကြီးရေချိုးခန်းဝင်ပြီး၊ရေချိုးထွက်လာလို့ သူ့ကိုစိတ်ပူရသေးတာ။ ပြောလိုက်သေးတယ်။”သူများက ကိုယ့်ကိုမစောင့်ရစေနဲ့” တဲ့။ ခရီးသွားရင် ဘယ်လိုမျိုးနေရမယ်ဆိုတဲ့ သင်ခန်းစာကိုလဲ သင်ပေးသွားတာပါ။ မိုးကုတ်ရောက်ပြီး နောက်တစ်နေ့မနက် မောင်လေးတို့အိမ်မှာ အလှူလုပ်တာမို့ မစားဘူးတဲ့ “နန်တုံ” လဲစားခဲ့ရဘူးပါသေးတယ်။~မိုးကုတ်တခွင်လှည့်ပြီးတော့ မေမြို့ကိုဆင်းလာကြပြီး၊ ချိုချိုရဲ့မိတ်ဆွေအိမ်မှာညအိပ်ကြပါတယ်။ အိမ်ရှင်က အိမ်ထဲမှာပစ္စည်း အပြည့်အစုံရှိတယ်၊ ကြိုက်သလောက်နေဆိုပြီး သော့ပေးလိုက်တာမို့၊ ကျမတို့အဖွဲ့ လွတ်လွတ်လပ်လပ်နေခွင့်ရခဲ့ပါတယ်။ ကျေးဇူးတင်လို့မဆုံးပါဘူး။

မေမြို့တစ်ခွင်လည်ပတ်ပြီးတော့မှ ရန်ကုန်ကို ညကားစီးပြီးပြန်လာခဲ့ကြတာပါ။

စိတ်အေးချမ်းသာစွာ သွားခဲ့ကြရတာမို့ – – – – နောက်ထပ်သွားချင်ကြသေးလားလို့တော့ မမေးမိစေနဲ့နော်။ ။