by Tekkatho Moe War ( U Moe Aung)

ငှက်ဟာ သူ့ရဲ့”ယုံကြည်ချက်တောင်ပံ” သည်သာ
အားထားရာလို့ သိသလို..

ပြည်သူဟာ ငှက်
ငှက်ဟာပြည်သူ….ပါပဲ….။

” ငှက်နဲ့ သစ်ကိုင်း “

ပြည်သူဟာ ငှက်
ငှက်ဟာ ပြည်သူ…။

ပျံလေတဲ့ဝေးဝေး
အသွေးအသား၊ ဆူပွက်သွားပစေ..
ရေ မြေလွှာချုံ့၊ တုံ့ဆိုင်းသွားပစေ….
တွေဝေ မရှိ၊ တိခနဲ ပိုင်းဖြတ်
လှုပ်ခတ် နရီမှန်၊ ရင်ခုန်သံလို
တောင်ပံအစုံ ရှိနေသရွေ့။

နွေအပူရှိန်တက်…
အရွက်မဲ့ အမြင်ရိုင်း၊ သစ်ကိုင်းကျိုးမတတ်
ကြွပ်ဆတ်ဆတ်ပေါ်၊ ခိုရပ် အနားယူ
သောက ပူပင်၊ နာကျင်မရှိ
ငှက်တို့၏ဟန်၊ အားထားရန်…
တောင်ပံအစုံ ရှိနေသရွေ့။

သစ်ကိုင်း ကျိုးကျေ
အောက်မြေသို့ကျ၊ စိုးစဥ်းမျှ အစဥ်
မပူပင်လေသလား
ဖြန့်ကား တဖျပ်ဖျပ်၊ တောင်ပံခတ်၍..။

ဪ… ပြည်သူဟာ ငှက်
ငှက်ဟာပြည်သူ….။ ။

တက္က သို လ် မိုး ဝါ
၈ – ၃ -၂၀၂၀
(ညနေ ၆ နာရီ)