Uncategorized

Songs by U Thu Kha

Kyaw Oo

ဘဝသံသရာသီချင်းစာသားကို ဆရာကြီးဦးသုခကိုယ်တိုင် ရေးသည်ဆိုခြင်းကို အချို့က ယုံကြည်လက်ခံရန် ခက်နေခြင်းမှာ ဆရာကြီးနှင့်ဂီတဆက်စပ်မှုကို ကောင်းစွာမသိကြသောကြောင့်ဟု ယူဆပါသည်။

ဇာတ်ညွှန်းရေးသူအဖြစ်နှင့် ဆရာကြီး အေဝမ်းသို့ရောက်စက သူ့ကို ဂီတနှင့် ကောင်းစွာအကျွမ်းဝင်သူမှန်း မည်သူမျှမသိခဲ့ကြ၊ ဦးသုခနှင့်ရင်းနှီးသော ဒေါ်မေရှင်ကပင် မသိခဲ့ချေ၊ ဆရာကြီးကလည်း ထုတ်မပြောခဲ့ပေ။ သို့သော် စိတ်ဝင်စားဖွယ် ကောင်း လှသောကိစ္စတစ်ခုကြောင့် ဦးသုခအကြောင်း သိသွားသောအခါ အဆိုရခက်၍ မည်သူမျှမဆိုချင်သည့် လှမဉ္စူသီချင်းကို ဦးသုခ အဆိုဖြင့် ဓာတ်ပြားသွင်းဖြစ်သွားခဲ့သည်။

ဦးသုခ ပထမဆုံးဒါရိုက်တာလုပ်သည့် ချစ်အဏုမြူဇာတ်ကားအတွက် “ဓမ္မိဿရဘဂဝါ အရေးယူပြခဲ့တာက၊ ထိတ်စရာ့ဘယာ တွေ တွေးယူဆကြပါတော့၊ အဝိဇ္ဇာတဏှာ ဒွေးမူလနဲ့ ချစ်ကြပါတဲ့သတ္တဝါတွေ” အစချီ ချစ်အဏုမြူသီချင်းစာသားကို ဦးသုခက ရေး၍ သဟာယဆရာတင် သံစဉ်သွင်းခဲ့သည်။

“သည်ဆောင်းဟေမန် မြောက်ပြန်လေညင်း ဆော်တယ်ကို၊ နတ်တော်ပြာသို ခွာညိုတည့်နှင်းဖုံဖုံ”အစချီ သည်ဆောင်းဟေမန် ဇာတ်ဝင်တေးကို ကိုစောညိန်းရေးခဲ့သော်လည်း ဦးသုခလိုချင်သော စကားလုံးများပါအောင် ကိုစောညိန်းက ကြိုးစားရှာဖွေ စပ်ဆိုခဲ့သည်။

“ဂုဏ် ဂုဏ်… ဂုဏ်၊ ဂုဏ်ဆိုတာ ငွေကိုခေါ်တယ်”အစချီ ဂုဏ်သီချင်းကို ဆရာရွှေပြည်အေးရေးသည်ဟု အချို့က ထင်ကြသော် လည်း ဦးသုခ၏စာသားကို ရွှေပြည်အေးက သံစဉ်သွင်းပေးခဲ့ခြင်း ဖြစ်သည်။မထင်မှတ်ဘဲ ဂုဏ်သီချင်း အရက်ကြိုက်သူတို့၏ ပါးစပ်ဖျား ရောက်သွားသောအခါ သူ့တွင် တာဝန်ရှိသည်ဟု ဦးသုခ ဝန်ခံခဲ့သည်။ ယင်းသီချင်းသည် အရက်အားပေးသကဲ့သို့ ဖြစ်သွားသော်လည်း သူရေးသားစဉ်က မဂ္ဂင်ရှစ်ပါး နောက်ခံစိတ်ကူးဖြင့် ရေးသားခဲ့သည်ဟု ဦးသုခက ဆိုသည်။အေဝမ်းက လှမဉ္စူသီချင်းကို ဦးသုခနှင့် ဓာတ်ပြားသွင်းဖြစ်ခြင်း အကြောင်းရင်းခံ၊ ဂုဏ်သီချင်းနှင့် မဂ္ဂင်ရှစ်ပါး မည်သို့ဆက်စပ်ပုံတို့ကို ရှာဖွေ မှတ်သားကာ “စာရေးဆရာဒါရိုက်တာဦးသုခ”စာအုပ်၌ ထည့်သွင်းထုတ်ဝေနိုင်ခဲ့သည့် အတွက် ကျေနပ်နေပါသည်။

https://www.facebook.com/watch/?v=473149240047899

“အသည်းနှလုံးကစကားပြောကြသည်၊ ကလလရေကြည် သန္ဓေတည်စက၊ အနေ့နေ့အလလ အထိုင်အထ အသွားအလာ များစွာခက်ရှာမည် မသက်သာပြီ ” အစချီ စကားပြောသောအသည်းနှလုံးဇာတ်ဝင်တေး စာသားကိုလည်း ဦးသုခ ရေးခဲ့ပါသည်။

Than Win Thu

ဆရာကြီးဦးသုခ “ရေမငုံ”ခဲ့ပါ

စတင်သီဆိုခဲ့တာ နှစ်ပေါင်း ၇၀ ကြာခဲ့ပြီဖြစ်သော်လည်း မြန်မာသံစဉ် တေးချစ်သူများ ယနေ့တိုင် စွဲမက်နေရ သည့်သီချင်း များ တွင် နွေနှောင်းရက်ကျန်နှင့် ဘဝသံသရာတို့လည်း ပါသည်။ ယင်းသီချင်းနှစ်ပုဒ်၏စာသားကို မည်သူရေးခဲ့သလဲဆိုသည်ကို တစ်ချိန်က အတော်အငြင်းပွားခဲ့ကြသည်။

နှစ်ပုဒ်စလုံးကို လက်ဦးသီဆိုသူမှာ ဆရာကြီး ဦးသုခဖြစ်၍ “သီချင်းစာသားများကို မည်သူရေးခဲ့သနည်း ဆိုသည်ကို ဦးသုခအား မေးခဲ့ကြသော်လည်း ဦးသုခက ပြတ်ပြတ်သားသားမဖြေခဲ့၊ ရေငုံနေခဲ့သည်”ဟု အချို့က ဆိုကြသည်။

မဟုတ်ပါ၊ ဆရာကြီးက ပြတ်သားစွာ ရေးခဲ့ပြောခဲ့ပါသည်။

နွေနှောင်းရက်ကျန်ကိစ္စအရင်ပြောပါမည်။ ဆရာကြီး အသက် ၇၅ နှစ်ခန့်က ဆရာကြီးကို မြန်မာ့ ရုပ်မြင်သံကြားက အင်တာဗျူး အနည်းဆုံးလေးကြိမ်ခန့် လုပ်ခဲ့သည်။ မေးသူက မြန်မာ့အသံဦးအောင်မြင့် ဖြစ်သည်။ တစ်ခုသော အင်တာဗျူး၌ “နွေနှောင်းရက် ကျန် သီချင်းအမည်၊ ရေးသူတို့နှင့် ပတ်သက်၍ အငြင်းပွားမှု ရှိနေပါတယ်၊ အဲဒါ ဆရာရှင်းပေးစေလိုပါတယ်” (စကားလုံး အတိ အကျမဟုတ်) ဟု ဦးအောင်မြင့်က ဦးသုခအား ဒဲ့ဒိုးမေးခဲ့သည်။ ဦးသုခက “သီချင်းအမည်မှာ နွေနှောင်းရွက်ကျန်၊ နွေနှောင်း ဝသန်မဟုတ်၊ နွေနှောင်းရက်ကျန် ဖြစ်သည်။ “နွေနှောင်းရက်ကျန် ဝသန်ပေါ်ဦးအခါ”ဟု ပါရှိရာ မိုးဦးကျခါစ ဖြစ်သော်လည်း နွေသရုပ်ပါသည့်နေ့ရက်များ ကျန်ရှိနေပါသည်ဟု ဆိုလိုသည်၊ ရေးသူက ဂီတနက်သန်ကိုစောညိန်း ဖြစ်သည်”ဟု ရှင်းလင်း ပြတ်သားစွာ ဖြေခဲ့သည်။

ဘဝသံသရာသီချင်းနှင့်ပတ်သက်၍မူ ဘဝသံသရာဇာတ်ကား ရုံတင်ပြီး နောက်ပိုင်း ဆရာကြီးဦးသုခသည် ဘဝသံသရာ သီချင်း ဖွင့်ဆိုချက်၊ ယင်းသီချင်းကို သူမည်သို့ရေးခဲ့သည်တို့ကို ဆိုင်းဝိုင်းကြီးများဖြင့် ဟောပြောသီဆိုပြခဲ့သည်။ ဘဝသံသရာကို “သူ ဘာ့ကြောင့် ဘယ်လိုရေးခဲ့တာ”ဟု ဆရာကြီးက ၁၉၇၇ ခုနှစ် မေ ၅ ထုတ် ကြေးမုံသတင်းစာတွင် ဆောင်းပါးဖြင့် အသိပေး ခဲ့ သည်။ မြန်မာ့ရုပ်သံအင်တာဗျူးတွင်လည်း ဦးအောင်မြင့်၏အမေးကို ဖြေရင်း “ဘဝသံသရာ စာသားကို ဘာ့ကြောင့်ရေးခဲ့၊ ဘယ်လိုရေးခဲ့ကြောင်း၊ ဦးဘသိန်းက သံစဉ်သွင်းပေးကြောင်း” ဦးသုခက ပြောခဲ့သည်။

ဆရာကြီး၏သဘောထားက အဆိုပါသီချင်းများကိစ္စ အများပြည်သူ ကြည့်ကြ ဖတ်ကြသော မီဒီယာများမှတဆင့် မချွင်းမချန် ပြတ်ပြတ်သားသား ပြောပြီး ရေးပြီးပြီ၊ ထိုသို့ သူပြတ်သားစွာပြောထားတာကို အသိအမှတ် မပြုလို၍ ဖြစ်စေ၊ အခြားအကြောင်း ကြောင့်ဖြစ်စေ ထပ်ဆင့်မေးလာသူတို့ကို ထပ်မဖြေလိုတော့သဖြင့် ဘာမျှပြန်မပြောတော့ခြင်း ဖြစ်ပါသည်။

အထက်ပါအချက်များကို “စာရေးဆရာဒါရိုက်တာဦးသုခ”စာအုပ်၌ ထပ်မံ၍ အကျယ်ရှင်းထားပါသည်။ သိလိုလျှင် ဖတ်ကြည့် ကြပါ။ထိုသို့ရှင်းသည့်တိုင် အငြင်းပွားမှုအငွေ့အသက်များ ကျန်နေနိုင်ပါသေးသည်။ ကျန်နေခဲ့လျှင် “ဖြစ်တတ်သည့် သဘာဝ ပဲ”ဟုသာ မှတ်ယူရန် ရှိပါတော့သည်။

Categories: Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s